عجين بعجين

من حكايات ابو توفيق باللهجة العامية الفلسطينية

إلْيوم يابو العبد , أختَك امّ توفيق عامْلِه أكْلِه بْتُوكِل أصابْعَكْ وَراها مِنْ كُثُرْ مَاهي طَيّْبِه … إسَّه بْتُوكِل منْها وبِتْشُوفْ…هايْ عَصيدِه مَاانْت عارِفها , كُنّا نْسَوّيها في الِبْلاد …سَقى الله هَذيكِ الأيّام …صَحيح إنْها عَجين بْعَجين .. لكِنْ وَالله إنْها أكْلِه طَيّْبِه وْزاكْيِه .. بَسْ هَالأكْلِه صارَت ثْقيلِه عَلى مِعْدِتْنا وِاحْنا في هَالسِّنّ….ألله الله عَلى أيّام زَمان لَمّا الواحَدْ مِنّا كانْ يُقْرُطِ الصَّخِر….وُعَلَى ذِكْرِ الْعَجين ..بْتِتْذَكَّر يابو العَبِد خَميرْةِ العَجين اللّي كانَتِ العَرُوس أيّام زَمان تْلَزِّقْها فوُقْ بابِ الدّار وُهي فايْتِه عَلى دارْ عَريسْها بْيوُمْ عرْسْها؟…قالْ كانَتِ تْلَزِّقْها عَ بابِ الدّار مِنْشان هي تْلَزِّقْ بِالدّار مِثِلْ مَالَزَّقَتِ العَجينِه بِالْحيط , وقالْ يَا سيدي عَشان تْثَبِّتِ شْروُشْها في دارْ جُوزْها…وكانَتِ الْمَرَه في بْلادْنا بَسِّ تْجيبْ صَبي , بِتْقُومِ بْتِرْفَعْ راسْها بينِ النّاسْ , وُماحَدا قَدّْها .. وُبِتْدَّقْدِقِ اوْتادْها بِالدّار , وُبْتْسُوكِرْ حَياتْها بْدارْ جُوزْها , وما حَدا بِعُودِ يْقَرِّبْ عَليها وَلا يْجيبِ مْعَدَّلْها بْكِلْمِه وَاحَدِه … لكِنِ الْمَرَه يَاحَرام .. يَاويلْها وْيَا سَوادْ ليلْها إذا هي جابَتْ بِنِتْ…يَعْني بِتْصيرِ حْكايِتْها حْكايِه … الْحَزينِه جُوزها بِنْسَمّ بَدَنُه , وُأهْلُه بِصيروا يِتْزاوَرُوها مْزاوَرَه .. وِالْبيتْ بِعَتِّمْ ,وُبِتْحِلّْ فيه مْصيبْةِ الْمَصايِبْ…إلْكُلّ بِتْلاقيه قالِبْ خِلِقْتُه .. مْكَشِّر وُبُوزُه شِبِرْ… وُكُلِّ قْرُودِ الدِّنْيا بْتِرْكَبُه….وَلاوْ .. بَسْ لإنْها جابَتْ بِنِتْ ؟! أيْ شُو ذَنْبِ الْمَرَه إذا جابَتْ بِنِتْ ؟ ليش هُو بْإيدْها يَعْني ؟….يَالَطيفْ مَا أقَلّ عَقْلِ النّاسِ اللّي بِفَكّْرُوا بِهَا الطَّريقَه هايْ..!

               محمد توفيق السهلي

                8 أيلول 2007م