سلام الله عليك ياشام

      من حكايات أبو توفيق باللهجة العامية الفلسطينية

هَذاك اليُوم, وْأنَا قاعِدْ عَلَى النِّتْ, ذَكَّرَتْني بِنْتْ شَامِيِّه, ألله يُسْتُرْ عَليها ويْسَهِّلْ عَليها وينْ  مَاكانَتْ…..ذكّرتْني بْعادِه مِنْ عَادات الشّْوامْ, مَفِشْ أحْلى مِنْ هيك …..قالَتْ البنت, إنُّه خالِةْ أبُوها كانَتْ تِحْكي لْها عَنْ عادات الشّام  أيّامْ  زَمان… قالتْ : كانُوا الشّوام زَمان يِتْساكَبُوا , يَعْني كُلْ صاحْبِةْ  بيت  بْتُسْكُبْ  لَجَارِتْها صَحِن مْنِ الأكِل اللّي  طابِخْتُه…..بِتْقُومْ  جارتْها  بَعْدِ  شْوَيْ  بِتْرَجِّعِ  لْها الصَّحِنْ بَعِدْ مَاتسْكُب فيه مْنِ الأكِلِ اللّي هي طَابِخْتُه….لإنُّه عيبِ كْبير إنّه  الواحَدِه  تْرَجِّعِ  الصَّحِنْ  فاضي ..

وُبِتْكَمِّلْ خالِةْ أبُوها  للبنت " والتعبير من عندي "… وفي يوم كانْ في إلْكُمْ جارَه  فَقيرِه  كْثير , وماحيلِتْها  حيلِه… يَعْني  بْتِشْكي  قِلِّةِ الفيرانْ في دارْها  مْنِ  الفُقُرْ  وِالْقِلِّه ….إمِّكْ  ألله  يِرْحَمْها  وْيِحْسِنْ إليها  وْيِجْعَلْ  مَسْكَنْها  الْجِنّه….سَكْبَتْ  صَحِنْ  أكِلْ  مِنْ  طَبيخْها  لَهَاالجّارَه  الفقيره….والجاره الفقيره بْتِعْرَفْ  مْليحْ  إنُّه  فِشْ  حَدَا بِرَجِّعِ  الصَّحِنْ  فاضي……هُونْ  هايِ  الْحُرْمِه  شُو بِدْها  تُسْكُبْ بِهَالصَّحِنْ؟ مَهُو  أصْلاً  مَعِنْدْهاشْ  إشي  تُوكْلُه….لكِنْ  بالرَّغِمْ  مِنْ هيك , قامَتْ  رَجَّعَتْ  الصَّحن  مَلانْ  لأبُو  مُوزِه……بْتِعْرَفُوا يَاحِزِرْكُمْ  شُو  سَكْبَتْ  هاي  الحُرْمِه  في الصَّحِنْ ؟………سَكْبَتْ فيه , وُعَبَّتُه زَهِرْ  ياسْمين  مْنِ  الْياسْمينِه  اللّي  عِنْدْهَا  في أرْضِ الدّْيارْ.

سَألْتْكُمْ بِالله , في بِالْعالَمِ الْعَرَبي كُلُّه , أوْ في الْعالَمِ  الإسْلامي كُلُّه , أوْ في الدِّنْيا كُلّْها , أحْلى مِنْ هيك عادِه ؟

أيْ وَالله الْعَظيم وَالله الْعَظيم , لَوْ مَكَنِشْ في الشّامْ إلا هَالْعادِه  لَوَحِدْها, لَكانَتْ بِتْكَفي وُبِتْوَفي …….سَلام الله عليكِ ياشام.

                 محمد توفيق السهلي

               16/تموز/2007م