فَنٌّ قائمٌ بذاتِه …نداءات الباعة في تراثنا

                   محمد توفيق السهلي

أكادُ أقْطع بأنّه لامثيل في العالَم كله لذلك الفنّ الذي امتازَ به الباعة المتجوّلون في الوطن العربي,من خلال نداءاتهم على بضائعهم,لاسيما السلع الغذائية التي كانوا يَحْملونها على دوابّهم أو عرباتهم,ويتجوّلون بها هنا وهناك في الأزقة والحارات والشوارع,وهم يروّجون لبضاعتهم بنداءات فنّيّة مبتكرة,ورثها الأبناء عن الآباء,جيلاً من بعد جيل..

ولقد سَمِعَ جيلُنا الكثير من نداءات الباعة في شتى أنحاء الوطن العربي منذ أربعينات وخمسينات القرن العشرين الماضي.

تتميّز نداءات الباعة بفن خاص فيه الكثير من الإبْداع..وقد بَرَعَ الجميع في هذا الفن,لكنني أكاد أجزم بأنّ أبرز الذين برعوا في هذا الفن هم الباعة السّوريّون بشكل عام والدمشقيّون منهم على وجه الخصوص,لكننا لا ننسى أيضاً ذلك الفن الرفيع الذي تمتّع به الباعة المصريون في نداءاتهم.

وسأحاول في هذا البحث أنْ أوجز بعض نداءات الباعة في بعض أقطارنا العربية قدر الإمْكان,ولكل سلعة على حِدَة.

الأنْكينار…في دمشق: أرْضي شوُكي الأنكينار ــ القُرْصْ طاحونِه ياشوكي.

الباذنجان …في دمشق :يارَيّان أسْوَدْ ياريان ــ أسْوَدِ مْنِ الليل ياريّان ــ على مال كَفَرْسوسِه ياريّان.

البامْية …في دمشق :خَضْرا هالْبامِه خضرا هالبامِه ــ اسْتانْبولِيِّه هالبامْيِه.

البرتقال…في فلسطين:ريحاوي يابُرْدْقان.

البَصّارَه : هي في فلسطين امرأة من النَّوَر,تبيعُ جهْدَها فتتجوّل في الأزقّة والحارات,في القرى والمدن,وتدور على البيوت,حيث"تبصّر"للناس,"فتُريهِم" بَخْتَهم وحَظَّهم وطالعهم,مقابل بضعة قروش,وتنادي أثناء تجوالها:بَصّارَه,بصاره ـ بّرّاجِه, براجه.وتقوم بضرْب الوَدَع.

وفي مصر يقوم بعض المغاربة والسودانيين بما يسمى "فتح الكِتاب" وينادون: نِفْتَحِ الكِتاب. حيث يفتحون الكتاب كيفما اتفق لمن شاء ذلك,ويقرأ منه ما يدلّ على تنبؤ بالمستقبل بناءًعلى توسّمه في وجهه,كما عرف المصريون ضرْبَ الوَدَع من قِبَل البرّاجه التي كانت تنادي: نِبَيِّنْ زين,نبيّن زين. وتحمل على رأسها في الغالب قفّةً أو منديلاً فيه وَدَعٌ.

البصَل…في دمشق: ياعَيّارِ البَصَل مال الحتيته ــ يامال حَزَرْما يابصل ــ ياعيّار البصَل ــ ياعَيّار بَصَلِ الْمونِه ياعيار.

البصل الأخضر… في دمشق: البَصَلِ الأخْضَرْ.

البطاطا ..في مصر:سيدي جابِرْ..لأنّ البطاطا تَجودُ في الأرض التي حوْل مقام"سيدي جابر".

وفي دمشق: يَبْرودِيِّه يابطاطا,لاتْضَّوِّعِ اللَّحْمِه بالرَّدِيِّه يابطاطا.

البَطّيخ …في دمشق:وين راعي السّكَّرْ,عَ المَكْسَرْ ياوَلَدْ ــ عَ المكسر ع المكْسَر.

وفي فلسطين:مِنْ جوُرْةِ العَسَل يابَطّيخْ ــ أحْمَرْ يابَطّيخْ,مِثْلِ الجّوُخ يابطيخ ــ جِنيني يابطيخ ــ بْبَّلاشْ يابطيخ ــ عَ السِّكّين يابطيخ ــ عَنْ دَويقْ يابطيخ .

البقدونس…في دمشق:بَقْدونِسْ طَرِيِّه.

البَقلاوَه…في فلسطين:بالسَّمْنِه يابَقْلاوِه,مْنِ الفُرُن يابقلاوه,بالفُسْتُقْ يابقلاوه,بالفستق الحلبي يابقلاوه.

 البَقْلِه:مَوِّل"مَوِّنْ"ويَبِّس البَقلِه ــ طَراوات يابقله طراوات.وفي فلسطين يسمّونها"فَرْفَحينِه".

البندورَة …في دمشق:يارَيّانْ أحْمَرْ يارَيّان ــ وْلي عَليكِ شو حَمْرا ياريّان ــ يللي بِدَّكْ تُطْبُخْ كَواجْ ياريّان.

وفي فلسطين:حَمْرَه يابَنْدورَه..بَلَدِيِّه يابندوره.

البوشار…في دمشق:عَبّيها للْجيبِه يابوشار.

البوظَه…في دمشق :عَلى باكِرْ ياشَبابْ ــ أكْلِ البوظَه على باكِر.

وفي فلسطين:تعالْ عِنْدي ياحبيب / تعال واشتِري دنْدرْما.دندرما بوظه بْكاسْ/إلْيوم بْمَصاري بُكْرَه بْبَّلاشْ.تعالوا عندي ياكلّ الناس/أنا بَبيع الدندرما.

يابنْت يَللّي عَ الدَّرَجْ/يللي عطْرِك مِنِّكْ خَرَجْ.دندرمتي دَرَجْ درج/ تعالي اشتري دندرما.

يابنت يللي عَ السّطوح/والشَّعَر الاِشْقَر عمّا يْلوح.بِدِّكْ تشتري والاّ أروح/أنا بَبيع الدندرما.

يابنت يللي واقفِه/ وعَلى المَصاري خايْفِه.إنْ كانْ إيدِك ناشْفِه/أنا أقَدِّمْ لِكْ دنْدرْما.دندرما بوظه بليمون/ تعال عندي ياحَنونْ.قالوا عَنَّكْ إنَّك مَجْنون/بطَّلْتْ انا أبيع الدّنْدرْما.

التُّرْمُسْ…في فلسطين:إمَّلَّحْ ياتُرْمُسْ ــ أزْكى مْنِ اللّوز ياترمس ــ بْشِلِنْ شْوالِ الترمس"والشوال هنا هو زَعْموط من الورق على شكل هرمي,ويسمونه في دمشق:بوري"

التّفّاح …في دمشق: يامالِ الزّبداني ياتفّاح.

التّين : في دمشق:دابِلْ لكنْ أبْيَضْ ــ شوهالتّينات ياقَطايِفْ ــ كُلّْ بِزْرِه بْحَسَنِه ياتين ــ على مال مَضايا ياتين.

الثوم…في دمشق:بْبَّلاش الرَّدي ياتوم ــوْلاعازْةِ الجّارَه ياتوم ــ يامالِ الكِسْوِه ياتوم ــ كسْواني ياتوم ــ يَبْرودي ياتوم ــ عازْتُه عازْة البيت ياتوم ــ وْلا عازْةِ الجّارَه ياتوم.

الجبْن الأبيض …في دمشق: عَكّاوي وأفراوي هالْجبن ياعَيّار ــ سَمْنِه وْزِبْدِه هالجبنِه.

الجبن القشْقَوان …في دمشق: مالْ أزْميرْ ياأشْقَوان مِدْري بَرْغارِيّه"بلْغاريّه".

الجَزَر…في دمشق: ياحلاوْتُه دِبْسُه بْقَلْبُه ــ خْيارِ الشِّتا وْمالِ القابون ياحلاوْتُه ــ مْحَلّي الأرامِل ياجَزَر ــ خْيارِ القابون ياجزر.

وفي فلسطين:بِقَوّي النَّظِرْ يا جَزَرْ.

الجوافة …في فلسطين:أزْكى مِنْ الِكْنافِه ياجَوافِه.

الحبوب المطبوخة…في دمشق:عَسَل بْشَهْدُه هالِحْبوب عسَل.

الحلاوة…في فلسطين:حَلاوْةِ النَّبي بَرَكِه .

الحليب …في دمشق :حَليبوُهب…حليبوهب ــ تازَه والرَّطْلِ بْقِرِشْ.

الحمّص الأخضر…في فلسطين:حامِلْ ومَلانْ ياحُمُّصْ.

الحمّص المسْلوق…في دمشق: بَليلَه بَلْبَلوكِ وعَ النّار حَطّوكِ يابليله ــ بُنْدُقْ يابَليلَه.

الخُبْز…في فلسطين:ألله كريم.

خبز رمضان…في دمشق :بالسَّمِنْ دَعَكوكْ وبالسِّكَّرْ حَلّوكْ يامَعْروكْ ــ هادا للصّايْمين ياصايِمْ…معْروك..معروك ــ ياللي الْهَوا رَماكْ ياناعِمْ.

الخُبّيزه…في دمشق: طريّه هالخبّيزِه ــ كول وداوي حالَك بالخبيزه.

الخسّ…في دمشق :ألله هالدّايِِمْ ألله هالدايم ــ يامال اللّوّان ياخَسّْ العَشْرَه الِكْبار ــ العشره الكبار يامال اللوان.

الخوخ ..في دمشق:أبو ريحَه ياخوُخْ.

        وفي فلسطين:دَوا الدّوُخَه ياخوُخَه.

الخيار…في دمشق : أصابيع بَدْرِيِّه ياخْيار ــ مابَلّيتُه جاري بَلُّه ــ أنا ما بّلّيتُه بَلْبَلْ حالُه/يَللّي بَلُّه يِبْليه بْحَلُّه…ياطَري يامال الشام ياخْيارــ من بين اللوبْيِه ياخْيار ــ بْإيدي حَوَّشْتُه ياخيار ــ أصابيعِ الْبُبّو ياخيارــ طَري وِجْديدْ ياخْيار ــ إلْعَتيق مَرْمَرْ ياخيار ــ أزْرَقْ نيلي ياخيار ــ مِنْ كَفَرْسوسِه والعين مَحْروسِه ياخْيار.

وفي فلسطين:أصابْعِ البُبّو ياخْيار,إمٌُّه بِتْحِبُّه ياخيار ــ طَري ياخيار ــ أطْرى مْنِ الزبْدِه ياخيار.

الزَّهْرَه"القنَّبيط"… في دمشق : تَبّيلو..تَبّيلو..تَبّيلو باللَّبَن يازَهْرَه. وفي فلسطين يلفظونها:"قَرْنَبيطْ".

زيت الزيتون … في دمشق : الزّيتْ بَلَدي هالزيت ــ مالْ حَرَسْتا يازيت ــ مالْ الجْدَيْدِه هالزّيت.

الزّيْتون … في دمشق : أسْوَدْ هالزّيتون ــ مْكَلَّسْ هالزيتون ــ حَبْلاسي هالزّيتون ــ كولْ زيتْ مَنْ هالزيتون ــ أخْضَرْ وِمْفَقَّشْ هالزيتون ــ جْلُطْ هالزيتون ــ اسْتَنْبولي هالزيتون.

السَّفَرْجل..في دمشق:كُلْ عَضَّه بْغَصَّه ياسْفَرْجِلْ ــ مالِ الأشْرَفِيِّه ياسْفرجل ــ بيروحِنِ القَلْبْ.

السَّكاكِر… في دمشق :حَلّي سنونَكْ ياوَلَدْ ــ فَواكي بالسّكّر ياولَد.

ْ

الشَّوَنْدَر المسلوق … في دمشق : ياسَلّيقْةِ الشَّمَنْدَرْ ــ بَرْدانْ تَعا صوُبي ــ يابردان يالله دوا للسَّعْلِه ــ طابْ وِاسْتَوى هالعَسَلْ ــ اسْتَوِتْ العَسَلِيِّه يابي.

الصابون...في فلسطين: نابِلْسِيِّه الصّابونِه.

الصّبّار…في دمشق:هَيِّه المَزّاوِيِّه ياحِلْوِه ــ لاتْدَّوِّرْ عليها الحلْوِه ليكْها ــ بِتْبِلّ القلب.

ويسمّونها:"صَبّارَه",وفي فلسطين تُدْعى"صَبِرْ"

صَنْدوق العَجَبْ …ويدعى في سورية"صندوق الدنيا",وبعضهم كان يسمّيه"عَجايْبا غَرايْبا"وفي لبنان يطلقون عليه اسم"صندوق الفرْجِه",وفي بعض مناطق سورية كان صاحب الصندوق ينادي:

عَجايْبا غَرايْبا,تَعوا تْفَرَّجوا يااوْلاد على عنتر ابن شَدّاد وأبو زيد الهلالي وعلى الزير أبو بطْن كبير,تعوا تْفَرَّجوا ياسَلام…

وفي فلسطين كان ينادي: تَعِ تْفَرَّجْ ياسَلام ,على أبو زيد الهُمام,تع تفرج على عنتر وعبْلَه,وتفرج عَ الزيناتي خَليفه ــ يالله تْفَرَّجْ ياسلام عَ العَجايِبْ مِنْ زَمان.

الطَّرْخون… في دمشق : إبْنِ الزِّنى ياخايِنْ ــ خايِن ياتَرْخونْ.

العَدَس …في دمشق:حوراني هالْعَداسْ.

عَرانيس الذُّرَة المسلوقة … في دمشق : هِيِّ بيضا وْرَيّانِه هالدّرَه.

العرقْسوس …في دمشق: هَلأ عَبّينا وْعَ النَّبي صَلّينا ــ تَعا دوُقِ العَسَلْ ــ خَميرْ ياسوُسْ ــ طَفّي شُوبْتَك ــ طَفّي الشوبه ياعطشان ــ

إلمَيّْ فيجِه والتّلج مَعْمَل ياخالْ ـــ قَرِّبْ علينا قرّب والحَلاوِه زايْدِه.

وفي فلسطين:بورِدْ ياعَطْشانْ ــ طَفّي حَرَّك ياعطشان.

عَكّوب الجبل… في دمشق :أبْيَض وبايِض ياعَكّوبِ الجَّبَل.

العنب ..في الشام :ديراني ياعِنِبْ ــ عَ العنب الزّيني ياعنب ــ الأبْيَضْ زيني والأحمَر ديراني بْأرْبْعَه الرَّطِلْ ياعنب ــ هَدّوا خْيامَكْ ما بَقى بالْكرم غير الحَطَبْ ــ ياحينُه تَعا وَدِّعْ ــ دوماني ياعنب.

وفي فلسطين:عِنِبْ وعِنّابْ ياعنبْ / أكْلِ الأحْباب ياعنب ــ لوُلا الشَّمِعْ غالي/لاضَوّي عليك اللّيالي ياعنب ــ مِنْ كَرِمْنا ياعنب ــ خليلي ياعنب.

وفي مصر:رحم الله الفاضِل ياعنب"نسبة إلى أيام القاضي الفاضل والعنب الذي كان في بستانه".

الفاصولياء ..في دمشق:شِلِّةْ حَريرْ يافاصولْيِا ــ بْلودانِيِّه يافاصوليا ــ مالْطِيِّه يافاصوليا ــ خَضْرا يافاصوليا ــ أطْرى مْنِ الهَلْيون يافاصوليا.

الفِجل…في دمشق: إِلْفِجِل فَجّالِه يالله عَليهُنْ ــ طَري وِجْديدْ يافِجِلْ ــاسْتانْبولي يافجل.

وفي فلسطين:طَري يافِجِلْ,أطْرى مْنِ الزِّبْدِه يافجل,حِلِوْ يافجل ــ مِنْ عين سينْيا يافجل.

الفليفْله… في دمشق :هِيِّ للْكَبيس يافْليفْلِه ــ أرْناؤوطِيِّه الفْليفْلِه.

الفول الأخْضَر ..في دمشق:يالله والرّيحَه بالْجَلَبْ يافَوّالِه ــ هادا للحليب يافولْ ــ فَوّالِه فَوّالِه.

الفول النّابِت… في دمشق : اسْتَوىوْطِلْعِتْ إيدُه هالنّابِت ـــ طلعت إيده هالنابت ياشَباب.

القثاء… في دمشق : على ضَوّْ الْقَمَرْ مادِّه هالقِتِّه ــ بارْدِه وْهَلْيون هالقتّه ــ كولْ وِكْبيس وعَبّي المَرْطَبان مِنْ هالْقتِّه ــ هالقتّه بِتْبِلِّ القلب ــ طَرِيِّه وْبارْدِه ياقتّه.

القْضامه … في دمشق :قَطْرَميزاتِ مْكَسَّرَه ياقْضامِه ــ قِشِرْ رمّان ياقضامه.

القماش…في فلسطين:بَضايِعْ بضايِعْ.

الِكْرُنْبْ …في دمشق :شُلْباطو ياكْرُنْب,شلباطو ياكرنب.

الكزْبَرَه…في دمشق:كُزْبَرَه طَرِيِّه.

الكعك…في فلسطين:سُخُنْ ياكَعِكْ,مْنِِ الفُرُنْ ياكعِك.

الكعك بالدِّبس… في دمشق :ياكَريمْ ــ تَماري وْكَعِكْ..تماري وكعك.

الكمأة… في دمشق :سَمْرَه يابِنْتِ العَرَب ــ هَبْرَه طَرِيِّه الكِمايِه.

الكمّثْرى ..في مصر:زَيْ قٌلَلِ الشَّرْباتْ ياكمثرى.

ويسمّيه السوريون  والفلسطينيون:نْجاصْ.وينادي بائعه في دمشق:يِضْرَبْ أبو زِبْلِه شوشايِفْ حالُه"وأبو زبله أحد أنواع الكمثرى" ــ طابْ ياعُتْماني,طابْ شوهالرّايِقْ.

الكنافة…في فلسطين: نابِلْسِيِّه ياكْنافِه.

الكوسا …في دمشق:هَيِّه موُزْ ياكوُسا ــ العَشْرَه بْعَشْرَه ياكوسا.

اللَّبَن  :في العراق تنادي بائعة اللبَن الرائب: روبَه بالكشْوَه..والكشوه هي الطبقة الدهنية السميكةالتي تكون فوق سطْح اللبن,وفي الشام وفلسطين ودول عربية أخرى يسمونها"قِشْطَه".

اللَّحْم …في فلسطين: أوزي يالَحْمِه.

لحْمُ رأس الخروف ..في مصر:ياجابِرْ..

اللّفت… في دمشق : ياكَبّاس أبْيَض وناهي هاللفِت.

اللوز…في فلسطين:مِنْ لوزِتْنا يالوز.   

الليمون…في فلسطين:يافاوي ياليمون.

مَسْحُ الأحذية…في فلسطين:تَلْميعَه مْليحَه,بْشِلِنْ التَّلْميعَه,أحْسَنْ تلميعَه بْشِلِنْ.

المسحِّر …في دمشق كان المسحّر ينادي في رمضان:يانايِمْ وَحِّدِ الدّايِمْ..يانايم وحّد الله..قومْ يا أبو فلان وَحِّد الله..قوم ياأبو فلان..وَحّْدوا ألله.

وفي فلسطين كان ينادي:يانايم وحّد الله,يانايم وحّد الله.

المشمش…في فلسطين:إلْهَوا رَماكْ يامِشْمِشْ ــ حَمَوي يامشمش.

المشمش الهندي "إكي دنْيا"… في دمشق :أكيدِنْيا ياحلْوِه.

مصلّح البوابير … في دمشق :مْصَلِّحْ بابورِ الْكازْ..مصلّح حَنَفِيّاتْ.

المقشّات "المكانِس"… في دمشق :بيتِيّات هالِمْقَشّات ــ شِغِلْ كَفَرْسوسِه الِمْقَشّات.

الملابس القديمة وسواها… في دمشق :ياللي عَنْدُه أواعي عتِقْ لَلبيعْ, ياللي عنده قْزازِ مْكَسَّرْ, ياللي عنده قِشِرْ رمّان,ياللي عنده بِزِرْ مرّْ,ياللي عنده خْزانات.

الملوخيّة … في دمشق : يامْلوخِيِّه خَضْرا ياملوخيه طَراواتْ ــ مَقْطوفِه يامْلوخيّه ــ حَبَشِيِّه ياملوخيّه.

الموز…في فلسطين: ريحاوي ياموز ــ لَلشِّفا ياموز.

الميرَمِيِّة…في فلسطين: لَلْمَغِصْ ياميرَمِيِّه ــ حِكْمِه عَرَبِيِّه الميرميه.

وفي دمشق يسمونها:مَرْيَمِيِّه.

النّعنَع…في دمشق :عازْتُه عازِه بالبيت يانعنع ــ كول أخْضَر ويَبِّسْ يانعنع ــ نعنع طعام ,نعنع طعام,عازْتُه عازْةِ البيت,نعنع طعام,خِلْفِه جْديدِه,نعنع طعام.

النَّمّورَه…في فلسطين: نَمّورَه يانمّوره/مثل خْدودِ الغَنْدورَه/ياربّي تُجْبُرْ يارب/وخَلّي العيشِه مَسْتورَه.

الهَريسة…في فلسطين:بالسَّمْنِ البَلَدي ياهَرايِسْ ــ هَرايِسْ بالسَّمِن.

اليَخَنا"المَلْفوف"… في دمشق : يَخَنا واطْبُخْ,والجارْيِه بْتُنْفُخ,والعَبِدْ عَ البابْ عَمّا يْقَلِّعْ الِكْلابْ.

وفي فلسطين هناك نداءات عامّة تصْلح لكلّ السّلَع:الكيلو بْكَذا والطَّمّاعِ يْوَشْوِشْني ــ أبو سَماحَه في السّاحَه ــ عَيِّطْ لإمَّكْ ياوَلَدْ ــ إللي مايجْري مايِلْحَق  .

 

 

ـــــــــــــــــــــــــــــــــــــــــــــــــــــــــ
التصنيفات : من عبق التراث الشعبي الفلسطيني | السمات:من عبق التراث الشعبي الفلسطيني
أرسل الإدراج  |   دوّن الإدراج