أنا وإبْني وِالْلُّعْبِه

    من حكايات أبو توفيق باللهجة العامّيّة الفلسطينية

مِنْ زَمانْ..مِنْ حَوالي سِتّينْ سِنِه..كُنْتْ أشوُفْ الاوْلادِ اللّي مِنْ جيلي كيفْ كانوا يِلْعَبوا بِاللُّعَبِ اللّي كانَتْ أشْكالْ وُألْوانْ…سَياّرَه بْتِشْتْغِلْ عَلى الزُّنْبَرَكْ..لُعْبِه بْتِمْشي عَلى الزُّنْبَرَكْ ,وُغيرْهَا وغيرْها إشي كْثيرْ..قَدّيشْ كُنْتْ أتْمَنّى إنّي ألْعَبْ بْلُعْبِه مِنْ هَاللُّعَبْ…لكِنْ مْنينْ ياحَسْرَه…مَهوُ الْواحَدْ مِنّا مَكَنْشْ مْلاقي إشي يُوكْلُه….

ظَلَّتِ اللُّعْبِه الزّْغيرِه حِلْمْ كْبيرْ…عاشْ مَعي وعَشَّشْ تَاكْبِرِتْ وِتْجَوَّزِتْ…لَمّا أجاني تَوْفيق ألله يْخَلّيلْكوا اوْلادْكوا…ماصَدَّقِتْ وينْتا يْصيرْ يِحْبي…قُمْتْ رُحْتْ اشْتَريتْ لُه لُعْبِه…سَيّارَه بْتِمْشي عَ الزُّنْبَرَكْ…

وُمِنْ سيعِةْ مَاوْصِلْتْ عَ الدّارْ…وُقَبِلْ مَاأشْلَحْ أوَاعِيّي..جِبْتْ الْوَلَدْ وُحَطّيتْ السَّيّارَه قُدّامُه وْصُرْتْ أبْرُمْ بِهَالزُّنْبَرَكْ وُأتْرِكْ السَّيّارَه تِمْشي عَ الأرْضْ وُأرْجَعْ أبْرُمْ وَابْرُمْ وَابْرُمْ…كُلُّه بْحِجِّةْ إنّي قاعِدْ ألَعِّبِ الْوَلَدْ…وِالْوَلَدْ كانْ زْغيرِ كْثيرْ لابِفْهَمْ لَلٌّعْبِه وَلابِعْرِفْ كيفْ يْشَغِّلْهَا…ظَلّيتْ ألاعِبْ الْوَلَدْ بِهَاللُّعْبِه تَامِنْهاَ اللُّعْبه كَفْرَتْ وِاهْتَرَتْ وُأنَا عَلَى وِرّ ورّ ورّْ…بِدْكوُا الْمَزْبوُطْ يَاجَماعَه؟ وَاللهِ الْعَظيمْ وَاللهِ الْعَظيمْ إنّي أنَا اللّي كُنْتْ ألْعَبْ بِاللُّعْبِه مِشْ إبْني.

                   محمد توفيق السهلي

                    6/ تموز/2007