الدَّبّوُر الفلسطيني

من حكايات أبو توفيق باللهجة العامّيّة الفلسطينية

مِنْ زَمان..كانْ في حُرْمِه إنكليزيِّه ,عايْشِِه بفلسطين,إسِمْها "فرانْسيس إميلي نْيوتن"..هاي الحرمه ظلَّتْ عِنّا في الِبْلاد خَمْسين سِنِه…ويوم ما هَجَّرونا من البلاد سنْة الثمان وأرْبْعين, ألله لايْهَدّي لْهُمْ بالْ, رَوَّحَتْ هي عَ بْلادْها…وهْناك كَتْبَتْ كُلْ إشي شافَتُه وسِمْعَتُه في بْلادْنا ,بِكْتاب سَمَّتُه"خمسون عاماً في فلسطين".

ومِنْ جُمْلِةِ اللي قالَتُه,إنْها في يوم من الأيام,راحَتْ تِتْفَرَّج على البيادِر في قَرْيِه من قرانا..قامَتْ شافََتْ دَبّور بِهَدّي على صَليبْةِ القَمِحْ ..بوخِذْ بْثُمُّه حَبِّةْ قَمِح وُبِطيرْ فيها…وفِشْ عَشَر ثَواني ولاّ الدّبور راجع ..تْناوَل أُخرى حَبِّه وراح……يعني الدبور رايح جاي يْزُق بهالقمح..

شوبِتْقول الحُرْمِه بينْها وبين حالْها؟ بتقول :إسَّه إحْنا بْنِعْرِفْ إنُّه الدَّبابير ما بْتوكِلش قمح…لَعادْ هالدَّبّور وين بِروحْ بهالْقمح؟…قامتْ لِحْقَتْ الدَّبور تَتْشوفُه وين بِروُح….واللي شافَتُه بِحُطّ العَقِل في الْكَف…شافَتْ الدبور بيجي على جِذِع سَجَرَه,وعلى هالسَّجَرَه في عِشْ عَصْفور,والعصفور إعْمى..لَمّنْ بُقْعُد الدبور يْزِنْ فوق العِشْ بقوم العصفور بِفْتَحْ مُنْقارُه ,الدبور بِزِتِّ حبة القمح بقلْبْ منقار العصفور وُبِرْجَع يجيب غيرها…هيك تَمِنُّه العصفور شِبِع…!!!

سَألْتْكُم بالله ,هالدَّبور الفَلَسطيني هذا مِشْ أرحَم مِنْ كلِّ بلاد الغرْب؟

محمد توفيق السهلي

  18/حزيران/2007