ــ قُرْص الجِبْنِه ــ

       حكايةٌ حَدَثَتْ

من حكايات أبو توفيق باللهجة العاميّة الفلسطينية

في يوم من أيّام الثمان وأرْبْعين,والدّنيا عَتْمِه زَيِّ الكُحُل,يَعْني بتْمِدّ اصْبَعَكْ ما بِتْشوفُه ,وجماعْة الهاجاناه اليهود بُنُغْلوا في الشّوارع نَغِل مِثْل النَّمِل,وِلاّ البنت الزّْغيرِه بِتْقوُلْ لابوها:يابا بِدّي جِبْنِه عَكّاوِيِّه…قالْ لّها:كُلي إسَّه أيْ إشي ,الدكاكين مْسَكْرَه,وبُكْرَه الصَّباح رَباحْ…ظَلَّت الزّْغيره تْعَيِّط لابوها,إسّه إسّه بدّي جبنه عكاويّه…

أمرْنا لألله,روح يابا ياخالد جيبِ لْها قرُص جبنه من الدكانه اللي في جنبْنا,مثل الطير الطاير يابا,إوْعَكْ تتْأخَّر يابا أوِ تْروح لَهون ولاّ لهون.

راح خالد عَ الدّكّانه , قريبه مَفِشْ عشر امتار,لاقى صاحب الدكّانه مَحْشور جُوّاتْها وخايف إذا طِلِع يِمِسْكوه ولاّ يُقُتْلوه…وَلك ياخالد شواللي طَلَّعك إسَّه مْنِ الدّار؟! قال لّه أبويْ بَعَتْني أشْتْري جبنه عكاويِّه..

أخذْ الوَلَد قرص هالجبنه وياأرْض اخلي لي,وهو راجع ع الدّار مِسْكوه اليهود,,أخذوه على معسكر مع كَمْ واحَد,وبعد أربع خمس سيعات قاموا فلَّتوه,رجع الولد يركض ع الدار وبايده قرص الجبنه…فات ع الدار مَلَقَاش حَدا,فتَّشْ دّوَّرْ,مَفِشْ ريحة بني آدم,إلولد أُخْرى شْوَيْ كانوا ظَبانات عَقلُه رايْحين يطيروا…مَهو زغير كان عمره بيجي عشر سْنين..

طلع خالد من الدار,قام لاقى ناس كثيرين طَلَّعوهم اليهود من بيوتهم ,ظل الولد ماشي مع هالناس ,وين ماراحوا يروح,هيك تاوِصْلوا على بلد عربي.

وبعدين عِرِفْ الولد إنُّ أهلُه ظَلّوا في الِبْلاد وما طلْعوش منها,وكانوا قاعدين في بستان من بساتين البلد,وبعدين رجعوا ع الدار.

بعد خمْسين سنه,يعني لمّا صار خالد عُمْرُه ستين سنه,دبّروا له ناس جَمِعْ شَمِل ,أهلُه كلّهم ماتوا مظلّش منهم غير أخته…

وعِنْدِ الجسر التقى خالد مع أخته اللي صارت في حيطان الستّين …تْعابَطوا وقعدوا الثنين يعيّطوا….قال لّها:خُذي خَيْتا…إيش هذا ياخيّا؟..قال لها:إنت افتحيها بتعرْفي ….فَتْحَت  الوَرَقَه ولاّ فيها قرص جبنه عكاويه!!!!!!

محمد توفيق السهلي